اسود بلا أنياب

الحدوته دي من وحي الخيال و لا علاقه لها بالواقع و إن حدث أي تشابه في الأحداث أو الشخصيات فهو من قبيل الصدفة البحته

كان يا مكان في سالف العصر والأوان ولا يحلى الكلام الا بذكر النبي عليه الصلاة و السلام.

كان في فيل جبار بيحكم الغابه وكان ظالم بياكل ويشبع ويشَبع صحابه، وباقي الحيوانات ياعيني غلابه مش لاقيين اللقمة ظَلم كتير وافترى كتير وكان فيه اسود المفروض بيدفعوا عن الغابة بس كان الفيل كابس على أنفاسهم وحاططهم في قفص مكتوب عليه ممنوع الإقتراب .

و في يوم من الأيام ثارت الحيوانات و هجمت على الفيل وعياله وصحابه الفيل جري على الاسود إلحقوني إلحقوني الحيوانات ثارت عليا إنقذوني الاسود قالت له سمعا وطاعه و عملوا نفسهم حايخرجوا للحيوانات بس الحقيقة إنهم كانوا عاوزين يخرجوا من القفص، المهم الحيوانات اول ما شافت الاسود في الغابه هللوا وسقفوا وهتفوا " الحيوانات و الاسود ايد واحده " واتحدوا وأجبروا الفيل وعياله على ترك الغابه وراح سكن في حته بعيده و استلمت الاسود الحكم و بعدها سادت الفوضي الغابه و زادت السرقة والقتل والبلطجة . اول قرار طلعوه إنهم حيلغوا الدستور و يعملوا دستور جديد وبعدين قالوا لالالا إحنا حانعدل الدستور بس و عملوا إستفتاء على المواد المعدله و بعد النتيجه ما طلعت قالوا حانعمل دستور مؤقت و محدش عارف ليه وبعدين قررت الاسود عودة كل الحيوانات المغضوب عليها والهربانه للغابه و خروج كل الحيوانات من السجون  كل الفيران و كل التعابيين .

هاجت الحيوانات وقالت عوزين نحاكم الفيل و مجلس الاسود مطنش وراح محاكم صحاب الفيل واحد ورا التاني علشان يهدوا الحيوانات لكن الحيوانات ثاروا تاني و تالت لدرجة ان الاشبال ثاروا هما كمان على الاسود  و اخر ما الحيوانات زهقت قالوا حنعمل ثورة على الاسود راح الاسد الكبير قبل الثورة عليه بيوم خلى النمر يحقق مع عيال الفيل و حبسهم و خلاه يبدء التحقيق مع الفيل نفسه .  الفيل استمرض ودخل المستشفي و النمر امر بحبسه في المستشفي !!!!! و بعدين مراته اتحبست في المستشفى برده !!!!!!! بس بعد ايه بعد ما الفيل و مراته وعياله و صحابه خبوا فلوسهم و طلعوا لسانهم للحيوانات !!!!

و ياعيني مسئول الامن في الغابه مش عارف يسيطر على الامن . حيوانات بتضرب في بعض الفيران طلعت من جحورها و التعابين كمان و بدئوا يضربوا في بعض و بدئوا يحرقوا بيوت بعض و الاسود قاعده تطلع بيانات " سنضرب بيد من حديد – لن نسمح بهذا الامر و غيرها من التصريحات اللي زي قلتها " و عماله تبعت حيوانات لها شعبية في الغابه علشان تحل المشاكل و الغابه في ضياع .... و الاسود مش عارفه تعمل حاجه .

الاسود قامت باعتقال الاشبال اللي ثارت عليهم "و محدش يعرف عنهم حاجه لحد دلوقتي " و قبضت على شباب الحيوانات و حكمت عليهم بتهمة البلطجه !!!

الحيوانات حست إن الاسود طلعت اسود بلا انياب و إن الاسود متواطئه مع الفيل و مش هاين عليهم انه يتحبس هو و مراته .

يا ترى يا هل ترى الاسود حتطلع بلا انياب ؟ الاسود حتطلع متواطئه مع الفيل ؟

خواطر / إسلام قطب