9 سبتمبر . . . يوم الكرامة

تحياتي ، ، ،

إليكم ما خرجت به جريدة الشروق علينا اليوم : 

أكد المشير حسين طنطاوى، رئيس المجلس الأعلى للقوات المسلحة أنه منذ تولى الجيش أمور البلد تم وضع مهام محددة وتوقيتات محددة لتنفيذها وأنه قبل المهمة من أجل مصر، وأشار أثناء حضوره المشروع التكتيكى للذخيرة الحية «بدر 11» إلى أن 99% من المصريين راضون عن المجلس العسكرى.
وشدد على ضرورة اتخاذ الحذر من بعض الحركات الخارجية التى تدعم حركات داخلية للإضرار بالأمن القومى لمصر، رافضًا وصفهم بالخونة ولكن وصفهم بغير الفاهمين، موضحًا أن المجلس العسكرى لن يدخل فى مهاترات مع المشككين، لأن القوات المسلحة هى الجهة القادرة على حماية الشعب والدولة ولولا الجيش ما نجحت الثورة.
وأضاف طنطاوى أن بعض الاشخاص والحركات لا تريد للمجلس العسكرى النجاح والوصول إلى أهدافه بتسليم البلد لسلطة مدنية منتخبة، قائلا «نتقبل التطاول بسعة صدر ولن نسمح باستدراجنا للصدام مع الشعب».

http://www.shorouknews.com/contentdata.aspx?id=513466#.TmHwae1C_CU.facebook

كلام جميل جدا !!!

طيب فاكرين يا ولاد لما كان أحمد عز بيقول أن المصريين شاعرين بالرضى !!

طيب فاكرين يا ولاد لما كان أحمد نظيف بيقول المصريين راضون عن الحكومة !!

ما علينا .

رسالة إلى سيادة المشير 

سيادة المشير

                    تحية طيبة و بعد ، ، ،

     يا فندم النسبة إللى سيادتك بتقول عليها مش مظبوطة وأنا من واقع إختلاطي مع الناس في الشارع أحب أقول لسيادتك أن 70% من المصريين غير راضين عن أداء المجلس و الـ 30% منهم 20%خايفين يقولوا رأيهم و 10 % بس هما إللي راضين يا فندم الناس حترضى عن المجلس في حالة وقف المحاكمات العسكرية للمدنيين. الناس حترضى عن المجلس لما ياخدوا بتار الشهداء و المصابين الناس حترضي لما العداله الإجتماعية تسود المجتمع و لما الأسعار تنزل و الغلابة تعرف تشتري اللحمة يا فندم حجم إستهلاك اللحوم المجمدة إنخفض 50% وده معناه أن الناس الغلابة ما بقتش تقدر تشتري حتى اللحمة المجمده يا فندم السواقين مش عارفين يشتغلوا علشان ما فيش بنزين ولا سولار في البلد واللهي واللهي لو العدالة الإجتماعية عمت على المجتمع الناس حتتبصت و حيحلفوا بحياتك .

يا سيادة المشير سيادتك بتقول نتقبل التطاول !! ليه بتسمي النقد تطاول ؟ و لو سيادتك بتتقبل التطاول ليه في 12000 مدني محكوم عليهم بالسجن في محاكم عسكرية ؟

أرجوك ما تعتمدش على التقارير إللي بتتقدملك و أرجوك افتح التليفزيون و بص بصة سريعة على الصحف

أرجوك ما تعتمدش على الشرطة العسكرية لحل الأزمات النظام السابق كان بيعتمد على الشرطة لحل الأزمات برده و طبعا سيادتك فاكر إيه إللي حصل للشرطة يوم 28  يناير !! يا سيادة المشير الحلول الأمنية صحيح بتجيب نتائج سريعة وبس بعد كده عواقبها وخيمة

وفي النهاية أحب أفكر سيادتك بأن الثورة قامت على أساس ( عيش - حرية - عدالة إجتماعية )

أحنا أنشاء الله نازلين يوم 9 سبتمبر علشان نحرر أخوتنا المسجونين الناشطين .

                                                                                                  خواطر / إسلام قطب

قراءة للمشهد

تحياتي

نبدأ بسرد المشاهد أولا ثم نبدأ بالتحليل :

المشهد الأول : 

 إعتصامات شباب الثورة في ميادين مصر المحروسة يوم 8 يوليو

المشهد الثاني : 

 مناوشات و تحرشات بين المجلس و الأهالي من جهه وبين شباب الثورة من جهه أخرى آخرها موقعة العباسية و موقعة سيدي جابر

المشهد الثالث : 

جمعة الأغلبية الصامتة بروكسي

المشهد الرابع : 

خرج علينا اللواء الرويني و صرح بأن حركة 6 إبريل ما هي إلا حركة ممولة من الخارج

المشهد الخامس : 

دعوة الإسلاميين لجمعة الإستقرار و فض الإعتصام .

المشهد السادس : 

مفاوضات بين القوى السياسية و الإسلاميين !!!! لتوحيد الصف

المشهد السابع : 

حشود السلفيين و الإخوان في ميادين مصر

المشهد الثامن : 

ساعة الصفر

التحليل :

كانت حركة 6 إبريل هي الفصليل السياسي الوحيد المتواجد بقوة في الساحة و هم من يحركون الشارع السياسي و ذلك بعد ما فقد الإخوان مصداقيتهم وسط الشارع السياسي و الجمهور لأسباب عديده لا يوجد لها مجال الآن لسردها و بالتالي وُضِع المجلس العسكري في مأزق فإنه لن يستطيع تلبية مطالب الثوار بسبب اللعبة التى يمارسها و بالتالي وجد الحل في السلفين و أطلق لهم العنان لتصفية الميدان زي بالظبط  لما السادات عمل لعبة التوازنات مع الإسلاميين ضد الشيوعيين !! و خصوصا أن السلفين ليس لديهم الحنكة السياسيه لأنهم ببساطة طول عمرهم في السجون " المفروض يدعوا للثوار لأنهم حرروهم من الزنازين .... ما علينا "

مشهد مستقبلي : ستزداد في المرحة القادمة حده التوترات و الإضطرابات الأمنية و ستبدأ مطالبات تولي السيد المشير رئاسة الجمهورية أو تولي أي شخص عسكري أخر هذا المنصب بحجة أن مصر و المصريين لا يصلح لهم إلا الحكم العسكري ويكون هذا هو الحل الوحيد للأزمة الراهنة .

ورمضان كريم و كل سنة و أنتم بخير

                                                      خواطر إسلام قطب

صباحو كدب

تابعت وكالات الإنباء العالميه و شهود العيان و رصدت الأحداث من  8/7/2011 وحتى اليوم و إليكم تحليلي الشخصي :

• أولا : المجلس سمح بظهور ما يطلقون على أنفسهم الأغلبية الصامته في ميدان روكسي إللي هما بتوع إحنا أسفين يا ريس .

• ثانيا : إستخدام الإسلاميين لفض الإعتصام بحيث يبدوا أمام العالم أن الشعب يصفي حساباته دون تدخل من المجلس الموقر وهذا يتضح من تهديد الجماعات الإسلامية بالتدخل لفض إعتصامات التحرير الجمعه القادمه بالقوه و ذلك حسب تصريح المهندس / عاصم عبد الماجد .

• ثالثا : خطط المجلس العسكري لفض الإعتصامات بطريقة غير مباشره و ذلك بدس وسط المتظاهرين بعض العناصر لصنع الشراره الأولى التي يطلقونها من بين المتظاهريين تجاه القوات العسكرية ثم ينتج عنها صدام ثم تضتر القوات بالتدخل المباشر لفض الصدام !!!! ولكن ظهرت له مشكله أن شباب الثوره ألقوا القبض على بعض هذه العناصر و كانت المفاجأه أن هذه العناصر ما هي إلا بعض أفراد القوات المسلحه مرتديين الزي المدني ودي تويتاية أحد شهود العيان 

 و بدأت الحقيقة تنكشف و بدأ الناس في نشر الفيديوهات فبادر المجلس العسكري بأصدر البيان رقم 69 بشأن إتهام حركة 6 إبريل بالوقيعه بين الجيش و الشعب و أنها هذه الحركه ممولة من الخارج !!!! طيب ليه 6 إبريل وليه ما تكنش حركة كفاية مثلا أو حركة ضباط 8 إبريل مثلا أو أو أو ............. كده يبقى فزاعه جديده إسمها 6إبريل بيخوفوا بيها الناس

• و بكده يبقي الأصوات والأهداف إتفتت و بناء على ماسبق أحب أقول لكم كده حيكون صراع على تورته مين إللي حيفرض كلمته  الثوار ولا المجلس ولا الإسلاميين ولا الأغلبيه الصامته ياساده ياكرام أنا شايف أن إحنا على مقربه من حرب أهليه .

                                                          خواطر / إسلام قطب

اسود بلا أنياب 3

الحدوته دي من وحي الخيال و لا علاقه لها بالواقع و إن حدث أي تشابه في الأحداث أو الشخصيات فهو من قبيل الصدفة البحته و ربنا يستر

كان يا مكان في سالف العصر والأوان ولا يحلى الكلام إلا بذكر النبي عليه الصلاة و السلام.

وصلنا يا ولاد لحد ما الحيوانات قررت تنزل يوم 27 طلعت التعابين تقول إحنا مش حنشارك معاكوا هاهاها مفيش مليونيه من غير التعابين و ربنا كسفهم وحصلت مليونيه محترمه ، التعابين طلعت متحالفه مع الأسود !!! ، الأيام دي بقى مجلس الأسود  بيقول إن الحيوانات قالت  نعم للإنتخابات أولا !!!! و إن الإستفتاء كان على الإعلان الدستوري ههههههههه حلوة يا أسود !!! والتعابين عماله تشتغل على نغمة الأسود ليه بقي لإن لو حصل إن الدستور اتعمل أولا حيكون ملزم للجميع و محدش بعد كده حيقدر يلتف عليه أما لو اتعملت الإنتخابات قبل الدستور طبعا التعابين والفئران والحشرات حتعمل دستور على مزاج مزاجها و بكده يقدروا يتحكموا في الغابه زي ما هما عاوزين !!!! و بالتالي مصلحة التعابين و الفئران و الحشرات أن تكون الإنتخابات أولا .... ما علينا المهم .من كام يوم كان فيه محاكمات لقتله الحيوانات أيام الثورة كلها إتأجلت فقام قرايب الحيوانات الشهداء بالإعتصام في الشارع فجالهم حد قالهم الحقوا الحقوا في تكريم قرايب الحيوانات الشهداء عند المسرح بس فكل المعتصمين جروا على المسرح و عينكم ما تشوف إلا النور طاخ طيخ طوخ أتاريها مصيدة و إختلفت الحكاوي حد يقول إن بلطجية بتوع الأمن عملوا المصيدة دي علشان يستردوا كرامتهم بعد العلقه السخنة إللي أخدوها أيام الثورة !!! و حد تاني يقول لالا دول بلطجية أصحاب الفيل بيردوا على الحكم بتاع تسريح المجالس المحليه بتاعت الغابه !!! وحد تالت يقول العلقه دي علشان محدش يتكلم تاني على المحاكمات !!!! المهم في كل ده فين مجلس الأسود ؟؟؟؟ طبعا نايم في العسل مع الفيل هههههههه مجلس الأسود نزل علشان يمسك الحيوانات الثوار زي كل مره " الأسود أنيابها ما بتبانش غير على الغلابه علشان بتتكسف " هههههه. الغليان رجع تاني للغابه الحيوانات بقت تهتف "الحيوانات تريد إسقاط الأسد الكبيييييييييير" ، و النهارده نزلوا الميدان في الغابه و البلطجية إندسوا وسطهم وهب كرسي في الكلوب و دارت معركه تاني .

دلوقتي بقي مجلس الأسود حيقع في ورطة كبيره مش واخد باله منها قرايب الأشبال إللي الأسود مسكتها يوم 8 و قرايب الحيوانات المعتقله و قرايب الحيوانات الشهداء و المتضاميين مع كل دول و الحيوانات الثوار بدءوا يتحدوا تاني و الحيوانات الغلابه إللي الأسعار حرقاهم حيتحدوا معاهم . و حيوانات كتييييييير لها مظالم بردوا إتحدوا معاهم وقرروا عمل إعتصام مفتوووووووووح لحد ما مطالبهم تتحقق !!!! وقرروا أن يوم 8 في الشهر حتكون ثورة التحرير !!!

القرد الحكيم هرش في دماغه و فكر شوية وقال : بس فيه مشكله الغابه كلها مش واخده بالها منها ألا وهي الإنقسامات و تعدد الأهداف يعني الثورة الأولى كل الحيوانات بكل طوائفها أتوحدت على كره الفيل و عياله و أصحابه وكره الظلم و الفساد وعلشان كده الثورة نجحت فلازم المره دي يتوحدوا على هدف واحد وطبعا الإختلاف لصالح مجلس الأسود و التعايين و طبعا الفيل.

وهتف القرد الحكيم و قال بأعلى صوته : يا شباب الغابه يا إئتلاف ثوار الغابه يا كل من سيثور في الغابه إتحدوا ففي الإتحاد قوة و يا تعابيين الغابه ويا فئران الغابه و يا حشرات الغابه إتعظوا و إعلموا أن الحيوانات تعلم جيد مصلحتها و إن الحيوانات تستطيع أن تصنع المستحيل و يا مجلس الأسود إعلموا أن شعار ثورة الحيوانات كان عيش – حرية – عدالة إجتماعية الحمد لله لا لاقين العيش – ولا حاسين بالحريه – ولا شايفين عدالة إجتماعية

 فَأَمَّا الزَّبَدُ فَيَذْهَبُ جُفَاءً وَأَمَّا مَا يَنْفَعُ النَّاسَ فَيَمْكُثُ فِي الْأَرْضِ

و للحكاية بقيه إن كان في العمر بقيه

                                                     خواطر / إسلام قطب

عزيزي المواطن : إحنا بنتضرب على قفانا !!!!

تحياتي 

هناك قوى خفيه تتحكم بالأسعار و تمتلك القرار السياسي و تمتلك القدره على تحريك الرأي العام هذه القوى ما زالت تحكم مصر حتى الآن تتعامل معنا بنفس الثقافة السابقة ، تعالوا معايا نلقي نظرة على الأحداث :

الشعب قال نعم للمجلس العسكري !!! أمتى ؟

 الشعب وافق على إن الدستور بعد الإنتخابات !!! معلش مش واخد بالي .

يا ساده يا كرام الشعب قال نعم و قال لا للتعديلات الدستورية مش للمجلس الموقر .

يا ساده يا كرام الإستفتاء ما كنش عن إنتم عاوزين الدستور أولا أم الإنتخابات أولا بلاش تغالطوا نفسكم .

طيب دوله مدنية أم دينية أم عسكرية ؟ ها إيه رأيك.....

المهم في كل ده واخدين بالكم من الأسعار عامله إيه ؟

أزمة بوتاجاز – أزمة سولار – أزمة عيش – إرتفاع السعر العالمي للسلعه - ...... مش ده برضه كان نفس إللي موجود قبل الثوره ؟

فاكرين زمان لما كان نظام اللا مبارك بيلهي الناس بطرق مختلفه و يرفع الأسعار و ما حدش واخد باله

الثورة قامت على أساس عيش – حرية – عدالة إجتماعية

الحمد لله لا لاقين العيش – ولا حاسين بالحريه – ولا شايفين عدالة إجتماعية

                                                   خواطر / إسلام قطب

الأخوان المسلمين .... من أجلك أنت !!!

في البداية  أحب أولا أوضح بعض الثوابت : أنا مش منتمي لأي حزب سابق أو حالى أو تحت التأسيس إطلاقا ، أنا مش علماني و أن كانت العلمانية ليست سُبة ، أنا لست كافر و موحد بالله لأن هذا المقال قد يغضب الأخونجية و من الممكن أن أتهم بالخيانة و العماله و الإختلاف في الرأي لا يفسد للود قضيه و في النهاية فهو رأيي .

منذ عام 1992 كتب الله علي أن أحتك بهم و أتعامل معهم . يحللوا لأنفسهم ما يحرمونه على غيرهم !!! يتلونون حسب الموقف يتقربوا إلى من هو سينفعهم بيظهروا باطن الحقيقة و غاية الدين عندهم الوصول للسلطة أيان كانت سواء نقابه أو مجلس إداره أو مجلس شعب . طيب نحلل الكلام ده :

أثناء التعديلات الدستوريه إللي فاتت طلع قادة الأخوان بشوية تصريحات منها نعم من أجل الأستقرار ، الجماعه لن تنافس على أكثر من 25% من مقاعد مجلس الشعب !!!! لن ندخل الأنتخابات الرئاسية !!!

و بعد شويه تصريحات تانية الجماعه سوف تتنافس على 50% من مقاعد مجلس الشعب !!! عبد المنعم أبو الفتوح يرشح نفسه لرئاسة الجمهورية !!!

فاكرين يا ولاد تصريحات الحزب الوطني كانت شكلها إيه ؟

نجري الشريط شويه لحد أحداث أطفيح و إمبابة موقف الجماعه كان إيه حد سمع لهم صوت حد شاف واحد فيهم على شاشة تليفزيون غياب تام ليه علشان عندهم حاجات أهم ...  الحزب إللي بيجهزوه !!!

فاكرين يا ولاد لما كان تحصل نصيبه كان حد بيشوف أعضاء الحزب الوطني ولا بيسمع صوتهم ؟

نجري الشريط شويه كمان و نوصل لجمعة الغضب التانية :

تصريحات أن الجماعه مش حتشارك في المليونيه ليه ؟

شوفوا الكليب ده

و بعدين تصريحات إنه لا مليونيه بدون الأخوان " تيييييييييييييييييت " ربنا كسفهم و حصلت مليونية محترمة

الثوره حرام " تييييييييييييييت تاني " طيب أنت كنتم معانا في 28 يناير ليه هي مش حرام ، كان لازم توضحوا التصريح يعني مثلا " الثوره على أهداف الجماعه حرام " أو " الثوره إللي مش حتنزل فيها الجماعه لا تجوز شرعا " . كده يعني علشان الواحد يفهم .

فاكرين يا ولاد لما كان أيام الثوره كان مشايخ الحزب الوطني بتطلع تقول إيه ؟

يجي بعد كده السيد المحترم صبحي صالح و يصرح بشوية حاجات مش حتوقف عندها لإن في ناس كتير ردت عليها أنا بس لفت نظري التصريح بتاع الأخواني ما يجوزش غير إخوانيه !!

بص يا عم صبحي :

هو ده تميز عنصري ولا إيه طيب في تعداد سمعتة قبل كدة أن عدد نساء الجماعه 9 أضعاف الرجال ولو إفترضنا أن كل راجل له 4 نساء شرعا يعني في 5 حيعنزوا !!!!

طيب بصوا على الكليب ده و قولوا رأيكم إيه في الراجل ده 

و في النهاية الكليب دة صورتة يوم 27مايو من أمام المنطقة الشمالية العسكرية مع شوية شباب زي الفل و في رساله للجماعة تعالوا نشوفها

                                                      خواطر / إسلام قطب

اسود بلا أنياب 2

الحدوته دي من وحي الخيال و لا علاقه لها بالواقع و إن حدث أي تشابه في الأحداث أو الشخصيات فهو من قبيل الصدفة البحته و ربنا يستر

كان يا مكان في سالف العصر والأوان ولا يحلى الكلام إلا بذكر النبي عليه الصلاة و السلام.

المهم يا ولاد وصلنا لحد ما الحيوانات ما بدأت تحس إن الأسود إنها متواطئة مع الفيل !!! و إن الأسود شكلها كده ملهاش أنياب !!! ؟؟؟

ومر كذا يوم وفجأة صحت الحيوانات من النوم الصبح على شويه أخبار ورا بعض آل إيه الفيل عاوز يقدم إعتذار للحيوانات و حيطلب العفو من الأسود له ولعائلته !!!!! و إن مرات الفيل طلعت من الحبس بعد ما عملت للنمر تنازل عن فلوسها و إن رئيس ديوان الفيل طلع بكفاله و إن رئيس مجلس الحمير هو كمان طلع بكفاله !!!!!! ههههههههههه ده كده تبقى الأسود متواطئه فعلا .

الحيوانات ضربت كف على كف وبدأت تسأل هو إيه إللي بيحصل الفيل حيقدم إعتذار طب عن إيه ولا إيه ولا إيه ؟؟؟؟ عن دم الحيوانات إللي ماتت ؟ ولا الجهل ولا الفقر ولا السرطان ولا ولا ولا ....... و بدؤا يسألوا طيب هما إللي في السجن محبوسين بسبب السرقة ليه ما يقدموش إعتذار هما كمان و إللى محبوسين بشيكات بدون رصيد و كمبيالات و إيصالات أمانة بـ 500 جنيه هما كمان بالمرة و إللي محكوم عليهم في قضايا قتل إيه نظامهم ؟؟؟؟ ولا أنياب الأسود على الغلابه و بس !!!!!!

المهم تاني يوم طلع عليهم الأسد الهمام الكبيييييييييير و عطاهم الصدمه التانيه إلحقوا الغابة على حافة الإفلاس الفلوس خلصت لازم نتعدل ونبطل تظاهرات و إعتصامات علشان مش حنلاقي ناكل و بعدين في كلام طلع من إللي حوالين الأسود طيب يا جماعه إحنا ممكن نعمل مصالحات مع الفيل و عائلته و أصحابه و ناخد الفلوس علشان نلاقي ناكل !!!!! . هههههه كملت .

إتلمت الحيوانات الثوار و بعض القرود الحكماء وفكروا في الكلام إللي بيتقال إكتشفوا إنه مش صحيح وإن الغابه مش حتفلس ولا حاجة قرروا إنهم يعملوا ثوره جديده للإطاحه بالأسود المهم طلع الأسد الكبيييييييير و نفي كل الكلام ده و طلع مسؤول الماليه و قال الغابه بخير و الفلوس كتيييييييييير . بس بعد إيه بعد ما الحيوانات فقدت الثقة في الأسود بعد ما أكتشفت إن الأسود أنيابها على الغلابه بس وإن الأسود متواطئه فعلا مع الفيل وإن الفيل كان في الأصل أسد و أن  الأسود  مش حيرضوا له الضرر و كمان في طراطيش كلام إن عيال الأسد الكبيييييييييير عندهم شركه مع عيال الفيل .

دلوقتي الحيوانات كلها إتحدت تاني و أخدت القرار و نازلين تاني للثورة على مجلس الأسود مش على الأشبال تحت شعار المجد للشهداء المجد للغابه لا لمجلس الأسود نعم لمجلس الحيوانات لا لمحاكمات الحيوانات الثوار نعم لمحاكمات الفيران و التعابين وطبعا قبلهم الفيل وعائلته.

يا مجلس الأسود عيب عليكوا ده إحنا الحيوانات الغلابه إحنا إللي جبناكم للحكم يا مجلس الأسود خاب أملنا فيكم .

و للحكايه بقيه إن كان في عمر بقيه.

خواطر/ إسلام قطب