زي الشعره من العجينه

النهاره كل الأنباء بتتكلم عن إحتمال صدور عفوا عام من المجلس العسكري عن (اللا مبارك) مبارك و عائلته و خروج سوزي هانم بكفاله و خروج سرور و عزمي بكفاله من قضايا الكسب الغير مشروع و أنهم لو إتنازلوا عن الفلوس دي حيتحفظ التحقيق !!!!

أي فلوس إللي جوه ولا إللي بره ؟إللي جوه طبعا طيب وإللي بره الله أعلم !!!. ماشي .

سيبكوا من كل ده خلينا مع اللا مبارك العفو ده حيشمل كل إللي عمله معانا خلال تلاتين سنه يعني حيشمل الآتي :

العفو عن قتل شهداء الثورة ، العفو عن القتلى في أقسام الشرطة و أمن الدولة و على رأسهم خالد سعيد ، العفو عن تورطه في سرطنة أبناء بلدي ، العفو عن إللي ماتو في العبارة ، العفو عن إللي ماتوا تحت صخرة الدويقه ، العفو عن قتلى حادث قصر ثقافة بني سويف ، العفو عن تصدير الغاز و عمولات البترول ، العفو عن كرامتنا إللي إتبعزئت في أم درمان والجزائر ، العفو عن إيه ولا إيه و لا إيه.... و في الآخر يطلع منها زي الشعره من العجين.

يا سادة يا كرام يا مسؤولي البلد كده كتير مرة فتنه مرة بلطجه وسرقه مرة أنابيب بوتاجاز و سولار ومرة إفلاس ومش حتلاقوا تاكلوا و في الأخر العفو ...  " تيييييييييييت " إرحموا أهلنا شويه إحنا زهقنا خلاااااااااص و أفتكروا كويس إن شرعيتكم مننا مش من الدول العربية ولا الدول الأجنبية ولا من مبارك نفسه مبارك خلاص راحت عليه ليموا الدور شويه و كفايه كده .

أنا حاسس إن الوقفه الجايه في التحرير قربت و مش حتعدي على خير

أنا عارف أن كلامي ده ممكن يزعل ناس كتير بس الأرزاق على الله

          خواطر/ إسلام قطب