أنا بكتب النهارده من حرقتي على إللي حصل إمبارح في إمبابة و قبل كده حادث أطفيح يا جماعة أنا مسلم و موحد بالله و بقول أشهد أن لا إله إلا الله و أن محمداً رسول الله و مش متطرف أعز أصدقائي صفوت متري و رأفت جورج و برده الشيخ خالد عبد العظيم و الشيخ جمعه يا ناس إللي بيحصل ده حيغرق المركب باللي فيها يا خلق هوه الدنيا حتولع طيب تعالوا نتأمل شويه الموضوع بدون زعل :
أولا : السلفيين قالوا عاوزين أختنا كامليا !!!! وعملوا هيصه جامده طيب إدوني أمارة إنها أختكم ،دي واحدة وقالت أنها مسيحية أكتر من مرة ولو إفترضنا إنها أسلمت و رجعت تاني للمسيحيه ( مرتدة ) و لما لقيتوا مفيش فايدة منها روحتوا طلعتوا موضوع عبير ؟ معقوله نولع البلد علشانها يا سادة يا محترمين بدل ما نقول عاوزين أختنا كامليا نقول عاوزين نعالج اخواتنا المصابين في الثورة عاوزين نساند أهالي اخوتنا الشهداء ده كلام العقل إنما للأسف من الواضح إن مفيش عقل . بلاش إغفال العقل و عدم التفكير و سماع الامر و تنفيذه بنظام " لاتجادل ولا تناقش يا أخ علي "
ثانيا : المسيحيين حقهم الطبيعي يدافعوا عن كنيستهم زي ما حقنا ندافع عن الجامع بس الكلام بيتقال إنهم بدأوا بضرب النار على المحتجين و أن الرشاشات طلعت من الكنيسه طيب هي الكنيسة دور عبادة ولا ترسانة أسلحه ؟ لو كان الكلام ده صح يبقى أنتم إللي بدأتم بالدم !!!! .
ثالثا : الجهل من الطرفين طبعا عرفين أن نظام اللا مبارك أتعمد تجهيل المصريين و الحد من قدراتهم العقلية تخيلوا كده أن واحد مسلم نص متعلم يتقاله إلحق المسحيين بيقتلوا في المسلمين ؟ أو واحد مسيحي نص متعلم يتقاله إلحق المسلمين بيولعوا في الكنيسه ؟
رابعا : تراخي النظام الحالي الحكاية بدأت الساعة 5 عصرا و الجيش و الأمن وصل الساعة 10 مساءا و بعدين نشوف التصريحات العنترية .
و سؤال موجه للإخوان المسلمين هو إنتم فاضيين بس للحزب الجديد و فريق الكورة و 50% من مجلس الشعب ولا عاملين نفسكم مش وخدين بالكم ولا بتخافوا من السلفيين؟ إللي أنا بفهمه إن الأحداث دي من صميم السياسة لو عاوزين شعبيتكم تكبر .
و في النهاية أقول
ادْخُلُوا مِصْرَ إِن شَاءَ اللَّـهُ آمِنِينَ
مبارك شعب مصر و بارك بلادي
خواطر / إسلام قطب
المشاركات
1 التعليقات:
والله انت راجل محترم وبتكلم بحكمه وعقل
إرسال تعليق